புதுச்சேரி சட்டப்பேரவைத் தேர்தல் களம் சூடுபிடித்துள்ள நிலையில், திருபுவனை (தனி)தொகுதியில் இந்திய கம்யூனிஸ்ட் கட்சி (மார்க்சிஸ்ட்) சார்பில் வழக்கறிஞர் மா. தட்சிணாமூர்த்தி தீவிரப் பிரச்சாரத்தில் ஈடுபட்டு வருகிறார்.
இத்தொகுதியின் கள நிலவரம் மற்றும் வேட்பாளர் குறித்த தகவல்கள் :
புதுச்சேரியின் மேற்கு திசையில், தமிழகத்தின் விழுப்புரம் மாவட்டத்தை ஒட்டி அமைந்துள்ள தொகுதி திருபுவனை. விவசாயத்தைப் பிரதான தொழிலாகக் கொண்ட இத்தொகுதி பல சிறப்பம்சங்களையும், அதே சமயம் சில சவால்களையும் கொண்டுள்ளது.
வாழ்வாதாரப் பிரச்சனைகள்:
அரசுக்குச் சொந்தமான நூற்பாலை இத்தொகுதியில் செயல்பட்டு வந்தது. ஆனால், ஆட்சியாளர்களின் தவறான கொள்கைகளால் தற்போது அந்த ஆலை மூடிக் கிடப்பது இப்பகுதி மக்களின் பெரும் கவலையாக உள்ளது.
வாக்காளர் விவரம்:
ஆண் வாக்காளர்கள்: 14,976
* பெண் வாக்காளர்கள்: 16,867
* மொத்த வாக்காளர்கள்: 31,843
தேர்தல் வரலாறு
புதுச்சேரியின் திருபுவனை தொகுதி ஒரு தனித் தொகுதி (SC) என்பதாலும், விவசாயம் மற்றும் ஆலைத் தொழிலாளர்கள் நிறைந்த பகுதி என்பதாலும், இங்கு இடதுசாரி இயக்கங்களுக்கு நீண்டகாலமாக ஒரு தார்மீகச் செல்வாக்கு இருந்து வருகிறது. இருப்பினும், தேர்தல் வெற்றிகளைப் பொறுத்தவரை மார்க்சிஸ்ட் கம்யூனிஸ்டு கட்சி ஒரு ‘ ‘தீர்மானிக்கும் சக்தியாகவே’ இருந்து வந்துள்ளது.
கடந்த காலத் தேர்தல் முடிவுகளைப் பார்க்கும்போது, சிபிஐ(எம்) கணிசமான வாக்குகளை சுமார் 6 முதல் 20% சதவீதம் வரை தொடர்ந்து பெற்று வருவதைக் காணலாம்: இப்பகுதியில் விவசாயத் தொழிலாளர்கள் மற்றும் ஆலைத் தொழிலாளர்களின் பிரச்சனைகளுக்காகப் போராடி வருகிறது.
அமைப்பு ரீதியான கட்டமைப்பு: கட்சியின் ‘மண்ணாடிப்பட்டு கமிட்டியில் 20க்கும் மேற்பட்ட கிளை அமைப்புகள் கிராமப்புறங்களில் வலுவாக உள்ளன.
ஆனாலும் 1964-ஆம் ஆண்டு முதல் இத்தொகுதியில் தேர்தல்கள் நடைபெற்று வருகின்றன. இதுவரை நடந்துள்ள 14 தேர்தல்களில் காங்கிரஸ், திமுக, அதிமுக மற்றும் என்.ஆர்.காங்கிரஸ் ஆகிய கட்சிகள் மாறி மாறி வெற்றி பெற்றுள்ளன. இந்த முறை 11 வேட்பாளர்கள் களம் காண்கின்றனர்.
தோழர் மா. தட்சிணாமூர்த்தி
எளிய குடும்பப் பின்னணியைக் கொண்ட ஒரு மக்கள் பணியாளராக மா. தட்சிணாமூர்த்தி கூலித் தொழிலாளி குடும்பத்தில் பிறந்தவர். தற்போது வழக்கறிஞராகப் பணியாற்றி வருகிறார்.
அரசியல் பயணம்: சிறு வயது முதலே சமூக அக்கறையுடன் செயல்பட்ட இவர், வாலிபர் சங்கத்தில் இணைந்து மக்கள் பணிகளைத் தொடங்கினார். தற்போது மார்க்சிஸ்ட் கம்யூனிஸ்ட் கட்சியின் மண்ணாடிப்பட்டு கமிட்டி உறுப்பினராகச் செயல்பட்டு வருகிறார். திருவாண்டார்கோவில் பகுதியில் வசித்து வரும் இவருக்கு மனைவி மற்றும் மூன்று பிள்ளைகள் உள்ளனர்.
30 உறுப்பினர்களைக் கொண்ட புதுச்சேரி சட்டப்பேரவைக்கு வரும் ஏப்ரல் 9-ஆம் தேதி தேர்தல் நடைபெற உள்ளது.
இத்தொகுதியில் நிலவும் வேலைவாய்ப்பு மற்றும் ஆலை மூடல் உள்ளிட்ட பிரச்சனைகளை முன்னிறுத்தி சிபிஐ(எம்) வேட்பாளர் தட்சிணாமூர்த்தி வாக்கு சேகரித்து வருகிறார்.
இப்போதைய சூழலில், மக்களின் ஆதரவோடு மார்க்சிஸ்ட் கம்யூனிஸ்ட் கட்சி இத்தொகுதியில் ஒரு வலுவான போட்டியை வழங்கி, வெற்றியை நோக்கி முன்னேறி வருகிறது.
